بسم الله ..نبدأ

سألت الفارس الملثم الدين يعنى ايه؟

كانت الاجابة : الحب

سألت تانى وليه ربنا عمل اديان وارسل رسل؟

كانت الاجابة: علشان بيحبنا

واول ما قلت ان الكلام ده هو اللى راح اكتبه فى الموضوع جانى اول اعتراض بينا كشركاء فى المدونة

والاعتراض كان : ازاى ..انت بتتكلم جد بس دى اجابات بسيطة

الاجابات البسيطة دى هى اللى بتعبر عن الاسلام ..لان الدين بتاعنا دين الفطره يعنى اجاباتنا لازم تكون عفويه تعبر عن احساسنا به زى ماهو من غير فلسفة ولا منظره ولا تعقيد ولا كلاكيع ..جمع كلكوعة

**************

فسألت قلب حر .. أنا الفارس الملثم اللي بتكلم الوقت

خدوا بالكم البوست ده مشترك

المهم قلت لقلب حر

طيب لو إنت إتسألت نفس الأسئله هتجاوب بإيه ؟

قال نفس الإجابه

بدون زياده أو نقصان

قلت له الناس هتقول عننا مجانين

قال وهو المطلوب إثباته

إيه مدونه المجانين دي .. لا أعلم صراحه

المهم مدونتنا هتكون عرض لديننا البسيط الجميل جدا

من خلال الآيات وسنه رسولنا الكريم صلى الله عليه وسلم ومواقف الصحابه

هنفتكر مع بعض حاجات جميله .. تزيد تمسكنا بدينا وفخرنا به

وقبل كل شئ حبنا لله ولدينا

حتى إذا قلنا

رضيت بالله ربا وبالإسلام دينا وبمحمد صلى الله عليه وسلم نبي ورسولا

نقولها قلبا وقالبا

***************************

أنا بقى .. قلب حر الميكرفون معايا

زى ما سمعنا كده من الفارس الملثم
وهى دى مدونتنا
هنتكلم عن الدين من خلال احساسنا احنا وفهمنا له
هـذا ديننـا
انا و الفارس الملثم
مش هنفرض رؤيتنا على حد
انما هنعرض رؤيتنا دى
وينوبك ثواب ياللى توجهنا اذا كنت شايف اننا مش فاهمين حاجة او فيه حاجة مش واضحة
هنتكلم عن دينا البسيط من خلال صور من حياة النبي عليه الصلاة والسلام ومن حياة الصحابة وامهات المؤمنين رضوان الله عليهم اجمعين
نشوف ازاى الناس دى لما فهمت دينها صح قدرت تعيش صح فى سلام واطمئنان وقدروا انهم يوصلوا ويتواصلوا مع ربنا فى علاقة اساسها الحب مش القهر والاكراه والاجبار
نتمنى نكون قدرنا نعرض الفكرة بشكل بسيط ومفهوم
اه قبل ماننسى
الاسلام يا جماعة رسالة
فاهمين يعنى ايه رسالة
يعنى واحد بيحب واحد وباعتله رساله ينصحه فيها ويوجهه او يعلمه
ليه؟
لانه بيحبه

ربنا بيحبنا والاسلام هو رسالته لنا

اشهد أن لا إله إلا الله واشهد أن محمد رسول الله